Падарожжа ў этнаказку
5 верасня выхаванцы рознаўзроставай групы наведалі школьны музей. Падчас знаёмства з экспанатамі ў дзяцей былі замацаваны ўяўленні аб беларускіх народных промыслах (ткацтва, ганчарства, саломапляценне). Вялікую зацікаўленасць выклікалі прадметы дэкаратыўна-прыкладнога мастацтва (вырабы з ільну, гліны, саломкі, дрэва, лазы).
Эмацыянальна афарбаваным было слуханне ў памяшканні музея беларускай народнай казкі “Жаронцы”, а таксама песенькаў і пацешкаў “Сіўка-варонка”, “Ходзіць коцік па палях”, “Ішоў Бай па сцяне”.
Рухомыя гульні “Блін гарыць”, “Лыка”, “Прэла-гарэла” дазволілі стварыць добры настрой, садзейнічалі развіццю памяці, кемлівасці, увагі.
Наведванне музея з’явілася адным са сродкаў выхавання ў дзяцей маральных якасцей, уласцівых беларусам (дабрыня, сумленнасць, гуманнасць, шчодрасць, працавітасць, спагадлівасць, гаспадарлівасць, любоў да роднага краю).
